څرنګه کولی شئ ډاکټر ته ورشئ

آیا تاسو اړتیا لرئ په دې پوه شئ چې څرنګه په امریکا کې ډاکټر ته ورشئ؟ د ډاکټر موندلو، وخت نیولو او روغتيايي کارکوونکو سره د خبرو کولو په اړه معلومات ولولئ. زده کړئ چې یوه شفاهي ژباړونکي ته د اړتیا پر مهال باید څه وکړئ


man talking to his doctor

څرنګه کولی شم ډاکټر پیداکړم؟

ډېری ټولنې روغتیايي مرکزونه یا روغتیايي کلینیکونه لري چې د لومړنيو روغتيايي مرستو ترڅنګ نور روغتیايي خدمات هم چمتو کوي. تاسو کولی شئ له ملګرو او ګاونډیو څخه پوښتنه وکړئ چې دوی څوک درته توصیه کوي. تاسو کولی شئ د بیا ځای پرځای کېدو له دفتر څخه غوښتنه وکړئ چې د لومړنيو روغتيايي مرستو چمتو کوونکی – ستاسو د ورځني کورني ډاکټر په موندلو کې درسره مرسته وکړي.

تاسو کولی شئ په خپل ښار کې د روغتیايي خدماتو د چمتو کوونکو لپاره په FindHello کې هم لټون وکړئ. د دې خدماتو ډېری چمتو کوونکي د مهاجرینو، نورو نویو راغلو کسانو او هغه خلکو ته چې بېمه نه لري خدمات وړاندې کوي.

FindHello CTA map
FindHello

تاسو ته د نږدې مرستې او سرچینو د لټون لپاره فاینډ هېلو وکاروئ. په خپله ټولنه کې د دندې لپاره مشورې، وکیلان، روغتیايي پاملرنه، د انګلیسي ټولګي او نورو خدماتو لپاره لټون وکړئ.

خپل لټون پیل کړئ

په بېړني حالت کې بايد څه وکړم؟

که تاسو د ژوند د ګواښوونکي بېړني حالت سره مخ شوئ، نو تاسو باید د خپل ځايي روغتون بېړنۍ څانګې ته ورشئ یا ۹۱۱ ته زنګ ووهئ.

هغه روغتيايي ستونزې چې بېړنۍ نه وي، خو تاسو يو بېړني ډاکټر ته اړتيا ولرئ، کولی شئ د روغتيايي پاملرني بېړنۍ څانګي ته او يا هم نږدې کلينيک ته ورشئ. دا خدمات عموماً ماښام يا د اوونۍ په رخصتيو کې وي او د لیدنې اخيستو پرته روغتيايي خدمات چمتو کوي.

د نورو روغتیايي ستونزو، معمولي ناروغیو، د معاینې یا واکسین لپاره بايد تاسو د لومړنيو روغتيايي خدماتو له ډاکټر سره لیدنه برابره کړئ.

زه څنګه له ډاکټر سره د لیدنې وخت ټاکلی شم؟

تاسو بايد له ډاکټر سره د لیدو لپاره وخت ونیسئ. تاسو کولی شئ د ډاکټر دفتر ته زنګ ووهئ او وخت ونیسئ. که تاسو په انګلیسي خبرو کولو کې ستونزه لرئ، د یو ملګري یا خپلوان څخه وغواړئ چې له تاسو سره په تلیفون کولو کې مرسته وکړي یا له تاسو سره ډاکټر ته لاړ شي. دا هم کولی شئ چې له دفتر څخه وغواړئ چې د تليفون لپاره يو ژباړونکی درته پيدا کړي، ترڅو له دوی سره په خبرو اترو کې ستاسو مرسته وکړي. د تلیفوني خبرو اترو لپاره لاندې معلومات وګورئ.

د تلیفون کولو مخکې، خپل د روغتیايي بیمې کارت پيدا کړئ

د ډاکټر دفتر به درڅخه ستاسو په اړه د معلوماتو غوښتنه وکړي. (که تاسو بیمه لرئ) نو ستاسو د روغتیايي بیمې معلومات ستاسو د روغتیايي بیمې په کارت کې دي.

  • د غړي ID # (دا د بيمې د کارت پر مخ د عددونو او تورو يوه اوږده ليکه ده)
  • ستاسو د بیمې د پلان نوم
  • د بیمې د پلان لپاره ستاسو د نوم لیکنې نېټه

(که تاسو دا معلومات نه لرئ، کولی شئ لومړی خپل د بیمې شرکت ته زنګ ووهئ او هغوی به وکولی شي چې تاسو ته په تلیفون کې اړونده معلومات درکړي او تاسو یې ولیکئ.)

که تاسو تراوسه روغتیا بیمه نه لرئ، په متحده ایالاتو کې د روغتیايي بیمې د ترلاسه کولو لاري چاري پیداکړئ.

کله چې تاسو زنګ وهئ

کله چې یو څوک تلیفون ته ځواب ورکړي، هغه ته وواياست چې تاسو غواړئ ډاکټر پيدا کړئ او غواړئ له هغه سره د لیدنې وخت وټاکئ. تاسو بايد هغوی ته دا په ډاګه کړئ چې تاسو د څه شي ډاکټر ته اړتيا لرئ. که تاسو ژباړونکي ته اړتيا لرئ، نو دا ښه وخت دی چې د مرستي غوښتنه ترې وکړئ.

د ډاکټر په دفتر کې موجود کس به ستاسو او ستاسو د روغتیايي بیمې په اړه پوښتنې وکړي. دوی به تاسو ته د لیدنې د وخت وړاندیز وکړي. که دا وخت ستاسو لپاره سم وي، نو کولی شئ چې هو ووایاست او د ډاکټر سره به ستاسو لیدنه برابره شي. که هغه وخت چې دوی يې تاسو ته وړاندیز کوي ستاسو لپاره مناسب نه وي، سمدستي په دې هکله ورته ووایاست، ترڅو دوی بل داسې وخت درته ولټوي چې ستاسو لپاره غوره وي.

د لیدنې وخت، نېټه او پته ولیکئ.

کله چې تاسو خپل د لیدنې وخت وټاکه، دا وخت درسره وساتئ.

ډېری ډاکټران د لیدنې د لغوه کولو لپاره سختې پالیسۍ لري، او هغه ناروغان چې د ډاکټر ليدني ته رانه شي يا دا ليدنه په وروستيو شېبو کې لغوه کړي، مجبور دي چې د ډاکټر سره د لیدنې پيسې ورکړي. همداراز، که یو ناروغ پرته له دې چې د لغوه کېدو غوښتنه وکړي د ډاکټر سره ډېرو لیدنو ته حاضر نه شي، کېدای شي په دې دفتر کې د دغه ناروغ هرکلی ونه شي.

د خپلې لیدنې لغوه کول

که تاسو د ډاکټر سره نه شئ لیدلئ، هڅه وکړئ چې دوې ورځې مخکې ورته زنګ ووهئ. حتی یوه ورځ مخکې یا په هماغه ورځ هم زنګ ورته وهلی شئ، دا تر دې ښه دی چې هېڅ تلیفون ورته ونه شي. که تاسو د خپلې لیدنې څخه لږترلږه یوه ورځ مخکې زنګ ووهئ، په دې سره به تاسو د لغوه کولو د فیس مخه ونيسئ.

د خپلې لیدنې له وخت سره سم ځان حاضر کړئ

کله چې تاسو ډاکټر ته ځئ، د خپلې لیدنې له وخت سره سم يا له هغه څخه وختي حاضر شئ. معمولاً، تاسو به اړتیا ولرئ چې دفتر ته له تګ مخکې ځینې فورمې ډکې کړئ. که تاسو په دې فورمو کې د څه لیکلو په اړه تشويش لرئ، کولی شئ له ملګري، خپلوان یا د دفتر د کارکوونکي څخه وغواړئ چې له تاسو سره مرسته وکړي.

په یاد ولرئ چې، که تاسو د خپلې لیدنې لپاره ډېر ناوخته کړې، ممکنه ده چې ستاسو وخت به بل چاته ورکړل شي او تاسو ته به اجازه درنه کړل شي چې له ډاکټر سره وګورئ. هڅه وکړئ ناوخته نه شئ!

کوم شيان باید د خپلې لیدنې پر مهال درسره راوړئ

  • خپل د بیمې کارت او د تادیې بيل هر سند چې تاسو ورته اړتیا لرئ درسره راوړئ
  • هغه درمل چې تاسو يې کاروئ لېست يې درسره راوړئ
  • د هغه شيانو لېست چې تاسو په ښکاره ډول حساسيت ورسره لرئ درسره راوړئ
  • له ډاکټر څخه چې هره پوښتنه لرئ ويې ليکئ او د ځان سره يې راوړئ
  • که غواړئ نوټونه واخلئ نو کاغذ او قلم درسره راوړئ

څرنګه کولی شم له ډاکټر سره خبرې وکړم؟

کله چې تاسو ډاکټر ته ورشئ، نو څنګه خبرې اتري ورسره وکړئ، په دې اړه دلته څو لارښووني شته چې عبارت دي له،

نوټ اخېستل

کله چې د روغتيايي خدماتو د مسؤول کس سره وينئ، نو له تاسو سره شته ټولې پوښتنې درسره وليکئ. د لیدنې پرمهال تاسو کولی شئ هغه څه ياداشت کړئ چې له لیدنې څخه مو زده کړي دي. تاسو کولی شئ د نوټونو اخیستو لپاره د کورنۍ غړی یا ملګری له ځانه سره راولئ. په دې توګه کولی شئ خپل پام دې ته واړوئ ترڅو هغه پوښتنې وپوښتنئ چې تاسو يې د ځان سره لرئ او د خپل روغتیايي خدماتو مسؤول خبرو ته په غور سره غوږ شئ.

پوښتنې وکړئ

په تکراري ډول د یو څه په پوښتلو مه شرمېږئ تاسو له ډاکټر څخه دا غوښتنه هم کولی شئ چې د اړونده لیدنې لنډيز او د نسخو په اړه هغه معلومات چې تاسو ورته اړتیا لرئ، وليکي. بیا تاسو کولی شئ له یو ملګري څخه وغواړئ چې دا معلومات درته وژباړي ترڅو په دې ډاډه شئ چې تاسو ورباندي پوه شوي یاست. که تاسو لاهم پوښتنې لرئ، کولی شئ د لیدنې وروسته د ډاکټر په د دفتر کې نرس ته زنګ ووهئ.

په دې اړه نور زده کړئ

کېدای شي ستاسو روغتيايي مسؤولين یو تشخیص وکړي، تشخيص د هغي ځانګړې ناروغۍ پیژندنه ده چې پر تاسو یې اغېزه کړې. په دې ځان ډاډه کړئ چې دوی ولي تشخيص کوي او له هغوی څخه وغواړئ چې ځيني معلوماتي سرچينې درته وښيي ترڅو له تاسو سره د ناروغۍ په پېژندلو کې مرسته وکړي. له دوی څخه وغواړئ چې د تشخیص په اړه ژباړل شوي معلومات درته وګوري.

ريښتوني اوسئ

د تشخیص کولو لپاره، به ستاسو روغتيايي مسؤول له تاسو څخه ستاسو د اوسني او تېرې روغتيايي تاریخچې په اړه پوښتنې وکړي. مهمه ده چې تاسو دغو پوښتنو ته په ريښتینولۍ او دقت سره ځواب ورکړئ. هغه معلومات چې تاسو یې وړاندې کوئ مستقیما له هغو روغتيايي خدماتو سره مرسته کوي چې تاسو يې ترلاسه کوئ.

ځان په دې ډاډه کړئ چې تاسو پوه شوي یاست

ستاسو د لیدنې د پای ته رسېدو سره سم، ځان په دې ډاډه کړئ چې تاسو په راتلونکو پړاوونو پوهیږئ. کېدای شي ستاسو روغتيايي مسؤول درته ووايي چې تاسو تر هغو چې خپله منظمه راتلونکې لیدنه ترسره کوئ بل ځل له ډاکټر سره ليدني ته اړتيا نه لرئ، یا درته ووايي چې دوی کېدای شي ژر له تاسو سره وګوري یا تاسو د درملنې لپاره يو متخصص ته راجع کړي.

که تاسو د راتلونکي ګام په اړه سم پوه شوي نه ياست چې څه بايد وکړئ، د پلان د بيا تشريح کولو غوښتنه وکړئ. همدارنګه تاسو کولی شئ له دوی څخه وغواړئ چې د راتلونکي هرې لیدنې لپاره پلان او نېټه ولیکي. ځان په دې ډاډه کړئ چې تاسو بايد د خپل روغتيايي مسؤول د تليفون شمېره له ځان سره ولرئ تر څو وکولی شئ چې که کور ته د راستنېدو پر مهال کومه پوښتنه درته پيدا شي، نو په اړه به يې اړيکه ورسره ونيسئ. په یاد ولرئ چې تاسو د خپلې روغتیايي پاملرنې په پلان کې مهم رول لوبوئ.

د اړتيا پر مهال د مرستي غوښتنه وکړئ

لکه د یوه روغتيايي دفتر په څېر، که تاسو په روغتون کې هم د روغتيايي پاملرني لپاره کوم ډاکټر ته ورځئ، اړتیا ده چې د خپل روغتيايي پاملرنې پلان په اړه باخبره اوسئ. روغتونونه په لويه کچه کارکوونکي لري چې ډېری خلک يې په بېلابېلو برخو کې خدمات ترسره کوي، خو ستاسو لپاره به هلته يو ځانګړی ډاکټر يا روغتيايي مسؤول هم وي. دا کس په نهایت کې ستاسو د روغتيايي پاملرنې مسؤل دی او تاسو بايد پوه شئ چې دا کوم یو دی. تاسو ته به یو نرس هم وګمارل شي. نرسان ډېرې غوره معلوماتي منابع دي او تاسو چې کومي پوښتنې لرئ په ډاډه زړه يې ترې پوښتلی شئ.

هغه موارد چې باید په یاد یې ولرئ

۱. د روغتیايي پاملرنې لومړنی چمتوکوونکی وټاکئ. دا به ستاسو اصلي ډاکټر او هغه لومړنی کس وي چې تاسو زیاتره د ناروغۍ پر مهال لومړی هغه ته ورځئ.

۲. که تاسو نوی ډاکټر لیدلی وي، بايد ځان په دې ډاډه کړئ چې دغه ډاکټر به ستاسو د بيمې په چوکاټ کې داخل وي، ترڅو ستاسو د بيمې شرکت له ډاکټر سره ستاسو د ليدني د فيس پيسې ورکړي. دا به له تاسو سره مرسته وکړي څو د داسي لوی بيل د تاديې مخه ونيول شي چې تاسو يې د تادیه کولو تمه نه وي لرلې.

۳. کله چې هره روغتیايي لیدنه ترسره کوئ يا درملتون ته مراجعه کوئ خپل د بیمې کارت له ځان سره واخلئ.

۴. که تاسو درمل اخلئ، همېشه د هغو درملو لېست چې تاسو يې کاروئ له ځان سره راوړئ.

ژبې ته لاسرسی

تاسو دا حق لرئ چې له خپل ډاکټر سره د اسانه خبرو اترو لپاره اسانتیا ولرئ. که تاسو یا د کورنۍ کوم غړی مو د ژبې له امله د ډاکټر په دفتر کې له ستونزې سره مخ وي، کولی شئ د شفاهي ژباړونکي غوښتنه وکړئ. د ډاکټرانو ډېری دفترونه او روغتونونه کولی شي له تاسو سره د مرستي لپاره په فزيکي توګه یا د تلیفون له لارې یو شفاهي ژباړونکی پيدا کړي.