Dwa elèv imigran ak lwa edikasyon

Lwa Federal ak Etatik sou Edikasyon

Lwa federal ak etatik yo pwoteje dwa elèv yo nan lekòl piblik yo atravè Etazini. Pandan yo aplike prensipalman pou lekòl elemantè, entèmedyè ak segondè, kèk lwa federal pwolonje pou aplike pou kolèj ak inivèsite yo, patikilyèman konsènan egalite chans yo pou etidyan tout sèks ak etidyan ki gen andikap.

Lwa etatik yo varye. Chak eta etabli pwòp règ li sou sa elèv yo aprann, ki moun ki ka anseye, ak kijan lekòl yo finanse.

Dwa ak edikasyon piblik

Tout timoun gen dwa frekante lekòl primè ak segondè piblik gratis nan peyi Etazini, kèlkeswa estati imigrasyon yo.

Dwa ak edikasyon piblik vini avèk egzijans tou:

• Paran ak responsab legal yo gen responsabilite pou enskri pitit yo nan lekòl piblik oswa prive.
• Tout timoun dwe ale lekòl pandan yon sèten kantite lane. Majorite eta yo egzije timoun ki gen ant anviwon 6 ak 17 lane pou yo ale lekòl.
• Lwa eta yo defini kondisyon ki pèmèt elèv yo abandone lekòl. Nan majorite ka yo, elèv yo dwe gen omwen 16 lane epi yo dwe gen pèmisyon pou yo sispann ale lekòl. Majorite eta yo egzije timoun yo pou yo ale lekòl jiskaske yo gen 17 oswa 18 lane, selon eta a.

Dwa pou opòtinite egalego

Tout lekòl piblik ak lokal yo gen egzijans pou yo ofri elèv yo yon aksè ak edikasyon piblik ki egalego .

• Lwa federal pwoteje elèv yo kont diskriminasyon nan edikasyon ki baze sou karakteristik tankou ras, koulè, orijin nasyonal, sèks, andikap, ak laj. Lekòl piblik yo pa kapab refize timoun yo aksè nan edikasyon primè oswa segondè akoz estati imigrasyon yo.
• Lekòl yo pa kapab fè diskriminasyon kont elèv yo nan aksè yo genyen nan kou, aktivite eskolè, espò, èd finansyè, ak lòt pwogram lekòl yo.
• Lekòl yo dwe bay sipò pou elèv ki gen sèten bezwen lengwistik ak relijye. Sa gen ladan l asistans lengwistik pou moun k ap aprann Anglè ak pwoteksyon pou pratik ak ekspresyon relijye elèv yo.
• Elèv ki gen andikap yo gen dwa ak amannman rezonab, edikasyon espesyal, ak sèvis ki gen rapò ak li yo selon kalifikasyon yo. Sa a ka enkli terapi fizik, terapi pou lapawòl-langaj, yon entèprèt lang siy, yon moun k ap pran nòt, lektè, ekipman enfòmatik espesyal, ak tan siplemantè pou pase yon tès.
• Paran yo ka konteste plasman pitit yo a nan yon pòsyon pwogram oswa nivo aprantisaj.
• Lekòl piblik yo pa kapab refize enskripsyon akòz estati imigrasyon oswa egzije prèv sitwayènte. Yo pa kapab egzije yon nimewo sekirite sosyal pou enskri yon timoun.

Soutyen nan zafè lang anglè

Elèv ki pa pale Anglè yo gen dwa a yon asistans lengwistik gratis. Lekòl piblik yo dwe idantifye moun k ap aprann Anglè yo epi bay asistans lengwistik pou yo ka patisipe nan lekòl la yon fason ki gen sans. Lekòl yo dwe kominike tou enfòmasyon enpòtan sou lekòl la bay paran ki gen konpetans limite nan Anglè nan yon lang yo ka konprann. Sa ka gen ladan entèprèt oswa materyèl ki tradui.

Pwoteksyon kont diskriminasyon

Diskriminasyon se trètman enjis yon moun sibi sou baz karakteristik reyèl li oswa karakteristik lòt moun kwè oswa asime se verite a pwopo li. Li ka fèt nan anpil domèn edikasyon, tankou:

• Admisyon ak enskripsyon
• Devwa ak aktivite
• Èd finansyè
• Disiplin 

Diskriminasyon ka pran anpil fòm. Li kapab enkli:

• Bay pote vye non epi ensilt
• Menas vèbal oswa vyolans fizik
• Eksklizyon nan aktivite yo
• Trètman elèv yo resevwa ki diferan

Lekòl piblik, kolèj, ak inivèsite pa kapab fè diskriminasyon kont elèv/etidyan, paran ak responsab legal, anplwaye, ak aplikan yo sou baz bagay sa yo, ak kèk eksepsyon:

• Ras, koulè, orijin nasyonal, orijin etnik, oswa asandans
• Relijyon
• Sèks
• Andikap (defisyans fizik oswa mantal)
• Laj (eksepte pou limit laj elèv K-12 yo)
• Gwosès, estati matrimonyal, oswa lefèt yo gen pitit

Pwoteksyon adisyonèl ka aplike dapre lwa eta a ki baze sou:

• Estati imigrasyon
• Kapasite lengwistik
• Idantite sèksyèl ak oryantasyon seksyèl
• Sitiyasyon lojman
• Estati ekonomik

Pwofesè, administratè, ak elèv/etidyan yo pa kapab sible, asele, oswa pwofile gwoup moun espesifik sou baz karakteristik sa yo.

Lekòl piblik yo dwe founi aksè ak edikasyon piblik pou elèv ki sanzabri yo. Elèv yo ki pa gen yon domisil pèmanan ka enskri nan lekòl la menm si yo pa kapab founi dokiman ki nesesè yo, tankou prèv rezidans.

Tout lekòl piblik yo gen obligasyon pou yo mennen envestigasyon sou diskriminasyon yo siyale ba yo epi pran mezi pou mete fen nan sa, trete efè li koze yo, epi anpeche pou sa rive ankò.

ICE nan lekòl la

Elèv yo gen dwa espesifik fas ak ajan imigrasyon yo.

Immigration and Customs Enforcement (ICE) kapab kounye a fè operasyon aplikasyon lalwa nan lekòl oswa toupre lekòl yo. Sa enkli lekòl matènèl, sant gadri, lekòl primè, lekòl segondè, kolèj ak inivèsite, epi lòt etablisman ansèyman.

Ofisye imigrasyon yo ka antre nan zòn ki louvri pou piblik la, tankou pakin oswa lobi. An jeneral, yo bezwen pèmisyon nan men responsab lekòl yo oswa yon manda jidisyè valab yon jij siyen pou antre nan zòn prive, tankou salklas, biwo, oswa twalèt.

Pèsonèl lekòl la pa oblije fè respekte lwa imigrasyon yo. Lekòl yo ta dwe gen yon plan pou fè respekte lwa imigrasyon, tankou yon moun ki fòme pou egzamine manda yo, kontakte paran oswa responsab yo, epi dokimante sa k te pase.

Anjeneral, lekòl yo pa kapab pataje dosye edikasyon yon elèv ak ofisye imigrasyon san konsantman amwenske gen yon eksepsyon anba lwa federal sou vi prive ki aplikab, tankou yon manda legal oswa yon lòd tribinal ki te emèt legalman. Lekòl yo ka pataje kèk enfòmasyon debaz ki nan anyè a, tankou non yon elèv oswa enfòmasyon pou kontakte li, sof si yo refize sa.

Kijan pou prepare pou ICE:

• Mande lekòl pitit ou a kijan li ta reponn ICE epi kijan li ta fè paran oswa responsab legal yo konnen.
• Asire w ke kontak ijans ou yo ak lis moun ki otorize pou vin chèche yo a ajou.
• Pitit ou ta dwe konnen nimewo telefòn yon paran, gadyen, oswa yon granmoun li fè konfyans.
• Fè yon plan preparasyon familyal.
• Mande lekòl ou a yon fòmilè pou refize FERPA si w pa vle yo pataje enfòmasyon anyè pitit ou a.

Sonje, timoun yo toujou bezwen ale lekòl. Rate anpil jou lekòl ka lakòz pwoblèm dapre lwa eta yo sou prezans lekòl.

Dwa pou libète ekspresyon

Tout elèv yo gen dwa pou yo eksprime tèt yo nan lekòl la a kondisyon sa pa vyole politik lekòl yo oswa pètibe aktivite eskolè yo Sa enkli pale, ekri, oswa eksprime tèt ou atravè mesaj senbolik.

Elèv yo gen dwa pou yo eksprime ak pratike lafwa yo nan lekòl la. Elèv yo ka obsève aktivite relijye tankou lapriyè nan lekòl la nan yon anviwònman ki pa deranje lòt moun. Elèv yo lib pou yo pale sou sijè relijye. Nan anpil eta, lekòl yo dwe pèmèt elèv yo pou yo absante yo pou yo selebre fèt relijye yo.

Kòd vestimantè lekòl piblik yo pa ka vize rad relijye pou entèdiksyon oswa règleman. Elèv yo gen dwa pou yo mete rad relijye, ki enkli foula, tiban, ak kipa. Rad ak mesaj relijye yo dwe jeneralman trete menm jan ak rad ak mesaj ki pa relijye ki konparab.

Lekòl piblik yo pa kapab pwomouvwa kwayans oswa pratik relijye, pami yo lapriyè nan lekòl la oswa pandan aktivite eskolè yo.

Elèv yo gen dwa pou yo rete an silans epi chita pandan Sèman Alejans lan.

Dwa pou gen vi prive

Tout elèv yo gen dwa ak vi prive anndan ak deyò lekòl la.

Lekòl yo pa kapab:

• Mande prèv sitwayènte oswa estati imigrasyon pou enskripsyon. Yo pa ka refize enskripsyon paske yon timoun gen yon sètifika nesans etranje oswa li pa gen yon nimewo sekirite sosyal.
• Pataje dosye edikatif elèv yo san konsantman sof si yon eksepsyon anba lwa federal sou vi prive aplike. Sa ka gen ladan yon sitasyon legal ki te bay legalman, yon òdonans tribinal, oswa kèk ijans sante ak safety. Lekòl yo ka pataje kèk enfòmasyon nan anyè a sof si yo chwazi pa patisipe.
• Fouye afè yon elèv, tankou yon sak lekòl, san yon manda oswa otorizasyon, amwenske yo gen motif rezonab pou yo sispèk yon règ te vyole.

Lapolis lekòl la

Elèv yo gen dwa espesifik fas ak lapolis.

• Lapolis lekòl la ka kanpe ak entèwoje elèv yo nan lekòl la si yo sispèk yo ap vyole nenpòt ki lwa oswa règ lekòl la. Elèv yo gen dwa pou rete an silans epi yo pa ta dwe reponn okenn kesyon san yo pa pale dabò ak yon paran, responsab legal, oswa avoka.
• Lapolis lekòl la pa ka itilize fòs ki eksesif kont elèv yo.
• Lapolis lekòl la ka arete yon elèv si yo gen prèv ki di gen chans pou l te komèt yon krim. Si yo te kenbe oswa arete pitit ou a, asire w sou lefèt li konnen pou l mande pou l pale ak yon avoka. Pa reponn okenn kesyon oswa siyen okenn dokiman san w pa pale ak yon avoka.

Lapolis lekòl la ka kanpe, entèwoje, ak fouye elèv yo nan lekòl la si yo sispèk yo ap vyole nenpòt ki lwa oswa règ lekòl la. Yo gen dwa pou yo rete an silans epi yo pa t a dwe reponn okenn kesyon san yo pa pale dabò ak yon paran, responsab legal, oswa avoka.

Lapolis lekòl la ka arete yon elèv si yo gen prèv ki di gen chans pou l te komèt yon krim. Si yo te kenbe oswa arete pitit ou a, asire w sou lefèt li konnen pou l mande pou l pale ak yon avoka. Pa reponn okenn kesyon oswa siyen okenn dokiman san w pa pale ak yon avoka.

Pwoteksyon kont entimidasyon

Entimidasyon se zak vèbal oswa fizik ki asele, entimide, oswa nui lòt elèv yo. Menas, anmède, entimidasyon, asèlman, vyolans fizik, imilyasyon, ak vòl, yo tout se fòm entimidasyon. Sibè-entimidasyon se entimidasyon ki fèt anliy (sou entènèt). 

Yo pa otorize entimidasyon nan lekòl yo. Eta yo gen diferan lwa ki entèdi entimidasyon nan lekòl yo ak anliy. Lekòl yo gen obligasyon pou yo gen politik sou fason pou yo anpeche entimidasyon epi trete zak entimidasyon yo, patikilyèman lè li enplike diskriminasyon.

Tout pwofesè ak administratè lekòl yo dwe pran mezi pou pwoteje elèv yo kont entimidasyon ak asèlman epi rezoud tout ensidan, patikilyèman lè li enplike diskriminasyon. Jwenn plis enfòmasyon sou www.stopbullying.gov

Pale pou pitit ou a epi siyale vyolasyon yo

Ou gen dwa pou w pale pou bezwen pitit ou a. Si li gen pwoblèm nan lekòl la oswa avèk devwa lekòl la bay yo, ou ka pale ak pwofesè li a pou konnen fason pou soutni pitit ou a. Si w pa jwenn èd, ou ka pale avèk yon konseye eskolè oswa yon administratè tankou direktè a.

Ou ka mande yon entèprèt si w pa pale anglè byen. Kèk lekòl gen yon lyezon kominotè oswa kiltirèl ki ka defann fanmi imigran yo.

Si ou kwè yo te vyole dwa ou yo oswa dwa pitit ou a, ou kapab depoze yon plent bò kote pwofesè, konseye, direktè lekòl la, epi direktè jeneral distri eskolè a. Li enpòtan pou otorite yo mennen envestigasyon sou ensidan an epi ede w angaje pousuit jidisyè si sa nesesè.

Ou kapab siyale diskriminasyon tou bay Department of Education, Office for Civil Rights.

Li ilegal pou yon lekòl fè reprezay kont ou poutèt ou siyale diskriminasyon oswa egzèse dwa lwa federal sou dwa sivil yo pwoteje.

---