Unawain ang mga pagbabago sa immigration sa ilalim ng bagong administrasyon

Ang kahalagahan ng tamang impormasyon

Sa mga panahong walang katiyakan, mabilis kumalat ang maling impormasyon. Puwede itong magdulot ng takot at pagkalito sa mga tao. Mahalagang makuha ang mga katotohanan mula sa mga mapagkakatiwalaang mapagkukunan, hindi mula sa mga tsismis o social media. Mag-isip din muna bago ka magbahagi ng impormasyong hindi mo sigurado. 

Mas mahihigpit na patakaran sa immigration

Ipinangako ni Pangulong Trump ang mas mahihigpit na patakaran sa immigration at mas istriktong pagpapatupad. Maaasahan mo ring magbabago ang pagproseso sa mga aplikasyon sa immigration, kasama na rito ang mas matagal na paghihintay, mas istriktong mga panuntunan para maging kwalipikado, at mas matataas na fee para sa mga benepisyo ng immigration. 

Maraming ahensya ang sangkot sa mga pagpapatupad ng immigration, kasama rito ang Immigration and Customs Enforcement (ICE), Customs and Border Protection (CBP), at ang Department of Homeland Security (DHS).

Mga raid, detention, at deportasyon

Dahil sa mga executive order ni Pangulong Trump, mas lumawak ang pagpapatupad ng immigration. Mas maraming tao ang maisasailalim sa mga pagdinig (proceeding) sa korte ng immigration, mailalagay sa mga detention ng immigration, at maipapa-deport mula sa U.S.

• Mga immigration raid: Ang ICE ay nagsasagawa ng mga immigration raid sa buong U.S. Madalas na nangyayari ang mga raid na ito sa mga lugar ng trabaho, pero puwede rin itong mangyari sa mga pampublikong lugar, gaya ng mga paaralan, ospital, at mga sentro ng relihiyon (religious center). Magiging target ng mga raid ang mga undocumented na immigrant, kahit gaano ka pa katagal na naninirahan sa bansa o kahit wala kang criminal record. Kahit may legal na status ka, kasama na rito ang U.S. citizenship, baka maapektuhan ka nito kung hindi mo agad mapatunayan ang status mo.
• ​​Mabilis na deportasyon nang walang mga pagdinig (hearing): Ipinapatupad na ngayon sa buong bansa ang pinabilis na pagpapaalis. Kung isa kang undocumented na immigrant na wala pang dalawang taon sa U.S., puwede kang ipa-deport nang walang pagdinig sa korte, malibang makita ng isang immigration officer na baka kwalipikado ka para sa asylum. Baka hindi magtanong ang mga officer kung natatakot kang bumalik sa bansa mo, kaya dapat mong sabihin ang impormasyong ito kahit hindi sila direktang nagtatanong.
• Mandatory o sapilitang detention at deportasyon para sa ilang krimen: Nire-require o inuutusan ng Laken Riley Act ang ICE na i-detain at i-deport ang undocumented na mga taong naakusahan ng, nakasuhan ng, o umamin sa mga krimeng gaya ng panloloob (burglary), pagnanakaw (theft), o shoplifting.
• Mas kaunting lokal na proteksyon: Plano ng federal na gobyerno na ipatigil ang mga patakaran ng lokal na kanlungang lunsod o sanctuary city. Posibleng hindi na magiging gaya ng dati ang mga proteksyong maiaalok sa iyo ng pamumuhay sa isang kanlungang lunsod o sanctuary city. 
• Kasali na ang lokal na law enforcement: Puwede nang tumulong ngayon ang mga pulis at sheriff sa pagpapatupad ng mga hakbang sa immigration. Ibig sabihin, puwedeng humantong sa pagkilos ng immigration laban sa iyo ang kahit anong interaksyon mo sa mga law enforcement o nagpapatupad ng batas. 
• Tapos na “catch and release”: Tinapos na ng gobyerno ang ginagawang pagpapalaya sa ilang immigrant mula sa detention habang naghihintay sila ng mga pagdinig sa korte. Ibig sabihin, baka manatili ka sa detention hanggang sa magkaroon ng pinal na desisyon sa kaso mo.
• Mas maraming detention center: Nagtatayo ang gobyerno ng mas maraming detention center, lalo na malapit sa hangganan ng U.S.-Mexico. Madalas na di-maganda ang mga kalagayan sa mga center na ito, at mahirap makakuha ng legal na tulong. Plano nilang makapaglagay ng mas maraming tao sa immigration detention.
• Mga pagbabago sa immigration status: Kapag nawala ang immigration status mo at naging undocumented ka dahil sa kamakailang mga pagbabago sa patakaran, manganganib kang ma-deport.
• Deportasyon nang walang mga pagdinig para sa ilang Venezuelan: Isang bagong utos ang nagpapahintulot sa gobyerno na i-detain at i-deport ang mga Venezuelan national na pinaghihinalaang konektado sa gang nang walang pagdinig sa korte. Kasalukuyan na itong hinahamon sa korte.

Immigration registration 

Isang bagong panuntunan o rule ang magre-require sa ilang immigrant na magparehistro sa pamahalaan ng U.S. simula Abril 11, 2025. Maraming immigrant ang ituturing nang nakarehistro, kasama na rito ang mga may Green Card, parole status, work permit (EAD), o nasa mga pagdinig (proceeding) ng korte ng immigration.

Sinabi ng DHS na layunin ng panuntunang ito na matukoy at i-deport ang mga undocumented na immigrant na nagrehistro o gipitin sila para kusa nang umalis sa U.S. Kung undocumented ka, puwedeng madagdagan ang peligro na ma-detain o ma-deport ka kung magpaparehistro ka. May mga tao na nag-aakalang makakatulong ito sa kanila na makakuha ng Green Card, pero hindi ito totoo.

Bago gumawa ng kahit anong aksyon, makipag-usap sa isang abogado ng immigration para maintindihan ang mga peligro at mga opsyon mo. Nag-aalok ang National Immigration Law Center (NILC) ng magandang impormasyon tungkol sa paksang ito. 

Hangganan ng U.S. at Mexico

Dahil sa mga kamakailang executive order, lalong naging mahirap ang pagtawid sa hangganan ng U.S.-Mexico at ang paghiling ng asylum sa hangganan. Sa ilalim ng batas, may karapatan ka pa ring humiling ng asylum, pero nagdeklara ang gobyerno ng U.S ng national emergency sa hangganan, na may mas mahihigpit na panuntunan at higit na pagpapatupad.

• Hindi na available ang CBP One app. Hindi mo na magagamit ang CBP One app para mag-schedule ng appointment na ipapakita sa isang port ng entry para humingi ng asylum. Kinansela na ang lahat ng kasalukuyang appointment.
• Dinagdagan ang militar at pagpapatupad sa hangganan. Nagdeklara ang U.S. ng national emergency sa timugang hangganan (southern border) ng U.S. Asahan mo ang pagdami ng detention, paggamit ng puwersa, presensya ng militar, pinalawak na pagtatayo ng pader, at mga surveillance tool na gaya ng mga drone sa hangganan. 
• Magsisimula na ulit ang Remain in Mexico (MPP). Noong unang administrasyon ni Trump, nire-require nito sa ilang taong gustong makakuha ng asylum sa hangganan sa timog na manatili sa Mexico habang hinihintay ang kanilang mga nakabinbing kaso sa korte ng imigrasyon sa U.S. Sa ngayon, wala pang alam na karagdagang impormasyon tungkol sa pagpapatupad na ito.

Humanitarian Parole

Tinapos o pinahigpit nang husto ng kamakailang mga executive order ang maraming programa ng humanitarian parole. Sa humanitarian parole, may mga pansamantalang nakakapunta sa U.S. dahil kailangang-kailangan ito agad (urgent reasons), halimbawa, para makatakas sa panganib o makapagpagamot. 

• Huminto na ang USCIS sa pagtanggap ng mga aplikasyon na nangangailangan ng Form I-134A. Kasama rito ang Mga Proseso para sa CHNV, parole para sa mga Ukrainian, CAM parole, at family reunification parole.
• Natapos na ang mga proseso para sa CHNV. Isinara na ang programa ng sponsorship para sa Cuba, Haiti, Nicaragua, at Venezuela. Hindi ka na makakapag-file ng mga bagong aplikasyon.
• Kung may parole ka sa ngayon dahil sa CHNV at wala kang ibang legal na paraan para makapanatili sa U.S., dapat kang umalis sa bansa sa petsa ng pagtatapos ng parole mo o pagsapit ng Abril 24, alinman ang mauna. Lahat ng work permit at mga travel document ay kakanselahin kapag natapos na ang parole mo. 
• Itinigil muna ang programa ng parole para sa mga Ukrainian . Hindi ka na makakapag-file ng mga bagong aplikasyon. Kung may parole ka sa ngayon dahil sa programang ito, mag-abang ng mga update. Ayon sa mga report, ang kasalukuyang humanitarian parole para sa mga pumasok sa United States gamit ang U4U ay magtatapos. Kung wala kang ibang status, mahaharap ka sa deportasyon.
• Hindi nagbago ang programang parole para sa mga Afghan. Wala pang partikular na anunsyo ang nagawa. Ia-update agad ito kapag mayroon nang mga karagdagang impormasyon.
• Sobrang lilimitahan ang parole sa hangganan. Ang mga opisyal sa hangganan ay magbibigay lang ng humanitarian parole sa mga bihirang emergency, at magiging mas mahirap na maging kwalipikado para dito. Kakailanganin mo ng matibay na ebidensya para matugunan ang mahihigpit na kinakailangan. Kung dati kang naging kwalipikado sa parole, posible ka na ngayong maharap sa detensyon o deportasyon. 

Mga pagtanggap sa mga refugee

Ang U.S. Refugee Admissions Program (USRAP), na nagpapahintulot sa mga refugee na manirahan muli sa U.S., ay sinuspinde nang walang katiyakan (indefinitely) simula Enero 27, 2025. Isang federal judge ang nag-utos sa gobyerno na muling simulan ang programa. Kahit nagsimula na ulit ang programa, maraming kaso ang hindi pa rin umuusad. 

• Limitado pa rin ang pagbiyahe ng mga refugee. Bagaman inutusan na ang gobyerno na i-resume o ipagpatuloy ang pagproseso, marami pa ring kaso ng mga refugee ang naka-hold, at hindi pa ganap na naibabalik o nare-resume ang pagbiyahe papunta sa U.S. ​
• Ang mga kaso ng follow-to-join (I-730) para sa mga asylee at mga refugee ay puwede nang magpatuloy. Ang mga kaso ng mga follow-to-join asylee ay pinoproseso sa ibang bansa at papayagan na silang magbiyahe, pero ang mga beneficiary na ang magbabayad ngayon ng mga medical exam nila at gastusin sa paglalakbay. Karamihan sa mga kaso ng follow-to-join refugee ay naka-hold pa rin sa ibang bansa, sa kabila ng utos ng korte na ipagpatuloy o i-resume ang mga ito. Naka-hold din ang pagbiyahe papunta sa U.S. 
• Makakabiyahe na ang mga may Afghan Special Immigrant Visa (SIV). Kung naaprubahan na ang SIV mo, makakabiyahe ka na papuntang U.S., pero ikaw ang dapat mag-ayos at magbayad ng sarili mong paglalakbay.
• Sarado na rin ang pribado o private sponsorship. Kung U.S. citizen ka o permanenteng residente, hindi ka na makakapag-apply para mag-sponsor ng mga refugee gamit ang programang Private Sponsorship.
• Apektado ang mga serbisyo ng resettlement. Pinahinto ang mga serbisyong tumutulong sa mga bagong dating na refugee at Afghan SIV. Ang mga lokal na ahensya ng resettlement ay naghahanap ng mga alternatibong paraan para masuportahan ang mga bagong dating. 
• Ang mga pagsisikap ng Safe Mobility Offices (SMOs) ay natapos na.

Pansamantalang protektadong katayuan (TPS)

Nilinaw ng isang executive order na malamang na i-review ng gobyerno ang kasalukuyang mga pagtatalaga ng TPS. Puwede silang magpasya na hindi na i-renew ang mga proteksyon para sa bansa mo kapag nag-expire na ang kasalukuyang status mo. Ibig sabihin, puwedeng mawala ang awtorisasyon mong magtrabaho at ang proteksyon mo para hindi ka ma-deport kapag natapos na ang petsa ng expiration. 

May mga kamakailang pagbabago na ginawa sa:

• TPS Haiti
• TPS Venezuela

Kung mayroon kang TPS para sa ibang bansa, tiyaking i-renew ang TPS mo sa lalong madaling panahon. Puwede mo ring tingnan ang iba pang legal na opsyon na kwalipikado ka. Puwede kang sabay na mag-apply para sa pag-renew ng TPS at iba pang proteksyon sa imigrasyon.

Pagbabawal sa paglalakbay

Inaasahang iaanunsiyo ng Trump administration ang isang bagong pagbabawal sa paglalakbay na may tatlong level ng paghihigpit o restriksyon. Ang pinal na listahan ng mga bansa ay ilalabas sa lalong madaling panahon, at puwedeng agad na magkaroon ng mga pagbabago.

• Kung galing ka sa isang bansa na nasa listahan ng pagbabawal sa paglalakbay at naglakbay ka sa labas ng U.S. papunta sa kahit anong bansa, baka hindi ka na payagang makabalik. Saklaw rin nito ang mga non-U.S. citizen, kahit na may valid kang Green Card o visa.
• Kung naglakbay ka papunta sa isang bansa na nasa listahan ng pagbabawal sa paglalakbay, baka hindi ka na payagang bumalik sa U.S. Saklaw rin nito ang mga non-U.S. citizen, kasama na ang mga may Green Card o visa.

Mga benepisyo para sa publiko

Hiniling ng isang executive order sa mga ahensya ng gobyerno na i-review at itigil ang pagbibigay ng benepisyo sa mga taong walang legal na status. Puwedeng hindi ka na makakuha ng mga pampublikong benepisyo kung hindi ka awtorisadong tumanggap ng mga ito. Kahit na awtorisado kang tumanggap ng mga ito, baka mas mahirap nang makakuha ng mga ito. Gayundin, ang federal funding o pondo para sa mga lokal na serbisyong gaya ng pangangalaga sa kalusugan, edukasyon, o tulong sa pabahay ay baka mabawasan, na makakaapekto sa suportang inaasahan mo. 

Panukala sa birthright citizenship

Isang bagong executive order ang naglalayong baguhin ang panuntunan ng Constitution para sa birthright citizenship sa United States. Ang birthright citizenship ay ang karapatan sa citizenship ng lahat ng batang ipinanganak sa lupain ng U.S., kahit ano pa ang immigration status ng mga magulang nila.

Tatanggihan ng panukala ng pangulo ang pagkamamamayan ng mga batang ipinanganak noong o pagkatapos ng Pebrero 19, 2025, kung nalalapat sa kanilan ang alinman sa mga ito:

• Ilegal na nasa U.S. ang kanilang ina at ang kanilang ama ay hindi isang mamamayan ng U.S. o hindi isang legal na permanenteng residente.
• Ang kanilang ina ay may legal pero pansamantalang presensya sa U.S. at ang kanilang ama ay hindi isang mamamayan ng U.S. o hindi legal na permanenteng residente.

Protektado ng 14th Amendment of the U.S. Constitution ang birthright citizenship. Marami nang legal na hamon para i-delay o pahintuin ang pag-usad ng panukalang ito. Kahit tinagubilinan ng executive order na ito ang mga ahensya ng gobyerno na gumawa ng mga hakbang para maipatupad ang pagbabago, ang panukalang mga pagbabago sa birthright citizenship ay hindi pa ipinapatupad. Abangan ang mga darating na update tungkol dito.

Iba pang inaasahang pagbabago

Bukod sa mga Executive Order, may karagdagan pang mga plano na binanggit ang administrasyon ni Trump sa mga pahayag sa publiko. Hindi pa sigurado o garantisado ang mga planong ito pero puwedeng makaapekto sa maraming tao kapag ipinatupad.

• Deferred Action for Childhood Arrivals (DACA): Binanggit ng administrasyon ang mga planong ihinto ang DACA o itigil ang mga pag-renew. Kung DACA recipient ka, humingi ng legal na payo sa pag-renew ng status mo. Puwedeng makaapekto rito ang isang kamakailang desisyon ng korte.
• Public charge: Baka bumalik ang mas mahihigpit na panuntunan o rule para sa mga immigrant na gumagamit ng mga pampublikong benepisyo, kaya magiging mas mahirap ang pag-a-apply para sa legal na status o para tanggapin at papasukin sa United States.

Ang magagawa mo ngayon

Narito ang mahahalagang bagay na dapat mong pag-isipan:

1. Makipag-usap sa isang immigration lawyer: Alamin ang mga opsyon mo para makapanatili sa U.S.
2. Alamin ang mga karapatan mo: Alamin kung ano ang gagawin kapag pinahinto ka ng mga immigration officer. 
   • Karapatan na manatiling tahimik.Hindi mo kailangang sagutin ang mga tanong tungkol sa kung saan ka ipinanganak o kung paano ka pumasok sa U.S.
   • Karapatan mong tumanggi sa paghahanap kung walang warrant na pirmado ng isang hukom.Puwede mong tanggihan ang paghahanap sa iyo, sa iyong bahay, sa iyong kotse, at sa iyong mga gamit.
   • Karapatan mong makipag-usap sa isang abogado.Kung ikaw ay ma-detain ng ICE, hindi obligado ang gobyerno na bigyan ka ng abogado. Kung maaresto ka ng pulisya, may karapatan kang magkaroon ng abogado na itinalaga ng gobyerno.
3. Gumawa ng safety plan: Maging handa sa mga sitwasyong gaya ng detention, deportasyon, o biglaang pagkahiwalay sa mga mahal mo sa buhay.
   • Magdesisyon kung sino ang mag-aalaga sa mga anak mo o mag-aasikaso ng pera mo.
   • Ligtas na itago at gumawa ng mga kopya ng mahahalagang dokumento na gaya ng mga birth certificate, passport, at mga immigration record.
   • Magdala ng katibayan ng legal na status mo, kung naaangkop. Gayundin, magdala ng patunay ng paninirahan sa US, tulad ng mga lease, bank statement, o pay stub, na sumasaklaw ng hindi bababa sa 2 taon para maiwasang mapasama sa pinabilis na pag-aalis.
   • Mag-save ng contact information para sa isang pinagkakatiwalaang abogado at mga miyembro ng pamilya.
4. Tumawag sa isang hotline ng immigration: para i-report ang mga raid, humingi ng tulong kapag na-detain ka, o i-report ang mga nawawalang migrant. 
   • National Immigration Detention Hotline: 209-757-3733
   • Hotline ng NAKASEC: 844-500-3222
   • United We Dream mag-report ng raid: 844-363-1423
5. Mag-apply at mag-renew para sa mga benepisyong kwalipikado ka: Kumilos na ngayon para maiwasang mawala ang status o mga benepisyo mo.
   • Panatilihing valid ang EAD at tiyaking na-renew ang status mo. 
   • Kung Green Card holder ka na kwalipikado para sa citizenship, pag-isipang mag-apply na ngayon.
   • Kung ganap na undocumented ka at wala pa sa DHS system, kumonsulta muna sa abogado para maunawaan ang mga potensyal na panganib at benepisyo bago mag-apply.
6. Pag-isipan ang mga panganib ng paglalakbay sa ibang bansa: Kung undocumented ka o may naka-pending na aplikasyon sa immigration, iwasan ang paglalakbay na puwedeng magpakomplikado sa kaso mo.
   • Siguraduhing up to date ang visa at passport mo.
   • Subaybayan ang mga update tungkol sa mga patakaran sa paglalakbay na puwedeng makaapekto sa iyo o sa pamilya mo. 
7. Maghanap ng lokal na tulong sa U.S. o tulong sa labas ng U.S. Tandaan, hindi ka nag-iisa. Nagsisikap nang husto ang mga tagapagtaguyod (advocate) at abogado na maprotektahan ang mga komunidad ng immigrant.
8. Protektahan ang sarili mo sa mga scam: Alamin kung paano iwasan ang mga scam sa immigration na nagtatangkang samantalahin ang mga sitwasyong ito.
9. Alagaan ang mental na kalusugan mo: Hindi madaling harapin ang stress at takot. Humanap ng suporta at humingi ng tulong kapag kailangan. 

I-save ang USAHello na 2025 Gabay sa Immigration kung saan ka makakakita ng regular na mga update. Manatiling may alam!

Iba pang bagay mula sa USAHello

Naghahanap ng partikular na impormasyon?

Immigrant rights

Ano ang aasahan sa mga detention center ng immigration

What to do if stopped by police